GEMSBOK-KURUMAN: Skokgolwe is onlangs vir ‘n tweede maal deur die Kuruman- en uitgebreide boerderygemeenskap gestuur, na die wrede moord op ‘n boer van die omgewing gelei het tot, wat beskryf word as ‘n gebrek aan geregtigheid vir die familie van Hendrik Venter (81), nadat die saak van dié vermoorde boer van die hofrol geskrap is. 
Venter is in September verlede jaar wreed op sy plaas vermoor. Hy het sy eiendom, geleë tussen Kuruman en Hotazel, omstreeks 08:30 verlaat om lone vir sy werkers te betaal. Sy liggaam is omstreeks 09:45 langs sy voertuig ontdek, met ernstige kopbeserings, het Cherelle Ehlers. polisiewoordvoerder, in ‘n verklaring oor die voorval gesê.

GEMBSOK-GROBLERSHOOP: Na ‘n ontstellende voorval verlede week, waartydens beweer word dat een van die plaaslike boere deur ‘n kommersiële boer aangerand is - wat dan ook blykbaar tot ‘n betoging gelei het, het ‘n positiewe en konstruktiewe gemeenskapsvergadering Maandagaand in Grootdrink plaasgevind.
Die vergadering is belê nadat die takleierskap van die !Kheis Boerevereniging, geaffilieer by die National African Farmers’ Union (NAFU), die saak onder die aandag van die provinsiale leierskap van NAFU gebring het. 
Hierdie intervensie het gelei tot die teenwoordigheid van sleutelrolspelers, insluitend Hendrik van Wyk (wyksraadslid !Kheis Munisipaliteit), lt. kol. Venter (stasiebevelvoerder, SAPD Groblershoop),  verteenwoordigers van die Gemeenskaps Polisiëringsforum (GPF), provinsiale president Messelaar en die Provinsiale Leierskap van NAFU asook leierskap van die !Kheis- en Groblershoop Boereverenigings.
Lt. kol. Venter het die gemeenskap ingelig oor die prosedures van die Suid-Afrikaanse Polisiediens (SAPD) en die toepaslike regsraamwerk. Sy het beklemtoon dat die polisie nie oor skuld of onskuld oordeel nie, maar bewyse versamel wat dan in die hof ter beoordeling voorgehou word. Sy het ook die publiek ingelig oor die bepalings van die Strafproseswet, spesifiek met verwysing na aanranding en verduidelik dat sogenaamde “gewone aanranding” nie altyd tot onmiddelike inhegtenisneming lei nie, aangesien dit onderhewig is aan die meriete van die ondersoek.

GEMSBOK-GROBLERSHOOP: Die lede van die Upington Grenspolisie het inligting wat ontvang is oor onwettige sigarette, wat by ‘n winkel in Groblershoop verkoop word, asook ‘n beweerde bergingsperseel waar ‘n lading sigarette vir die genoemde winkel afgelaai is vir berging, opgevolg.
Die perseel is deur Misdaadintelligensie bevestig en ‘n deursoekingslasbrief is verkry. 
Op Woensdag 25 Junie 2025 is ‘n koop-en-opsporingsoperasie uitgevoer met die hulp van die Upington K9-eenheid en Doeane.
Met die deursoeking van die genoemde perseel het die polisie 110 palette, 68 kartonne en 46 pakkies sigarette ter waarde van ongeveer R2,8 miljoen ontdek - wat gekonfi-skeer is en aan doeane oorhandig is vir verdere ondersoek.  

KURUMAN: ‘n Suksesvolle samewerkingspoging tussen die Noord-Kaap en Noordwes-polisie het gelei tot die arrestasie van drie verdagtes in verband met ‘n moord wat op 1 Junie 2025 in Kuruman plaasgevind het.
Daar word beweer dat ‘n 38-jarige man noodlottig by Seoding Blok A geskiet is.
Na ‘n intensiewe ondersoek het lede van die Noord-Kaapse Misdaadintelligensie, in samewerking met Misdaadintelligensie in die Noordwes-provinsie, die Mahikeng Taktiese Reaksiespan en die Vryburg Openbare Orde-polisie, ‘n gekoördineerde, intelligensie-gedrewe operasie in Ganyesa in die Noordwes-provinsie van stapel gestuur.