Janie Schneider Skool het weereens ‘n suksesvolle markdag agter die rug. Een van die hoogtepunte was Curro se marinba-orkes wat opgetree het. Verskeie motorfietsklubs het besoek, en hulle het die trapkarre, en wors vir die worsbroodjies geborg. Daar was ook verskeie stalletjies met handgemaakte items, ‘n teetuin wat leerlinge beman het, en ‘n springkasteel.
Klerksdorp Rekord, Klerksdorp - Die Orkney & Klerksdorp Diereskuiling het ‘n moeilike paar maande agter die rug, maar het weer rede om te glimlag nadat hulle ‘n nuwe voertuig in ‘n ruim borgskap ontvang het.
“Ons het ‘n baie moeilike tyd deurgemaak. Nadat ons bakkie in die vloede beskadig is, het ons ses lang weke sonder ‘n voertuig deurgebring. Ons kon nie op noodgevalle reageer, diere vervoer of ons daaglikse versorgingswerk doen nie. Dit was hartverskeurend,” het Diane Jacobs van die skuiling gesê.
Klerksdorp Rekord, Klerksdorp - ‘n Skoolmeisie van Alabama is besig om winterklere en komberse in te samel vir mense in nood met die winter wat reeds opwagting gemaak het.
Kaitline Cloete (16) is ‘n finalis in die Miss Teen Africa South Africa-kompetisie, en ’n leerling aan Hoërskool Schoonspruit.
Sy doen ‘n beroep op die gemeenskap om die liefdadigheidsprojek te ondersteun. Enige ou wintersklere is welkom, veral jasse, serpe, musse, en skoene. Hierdie items sal versprei word aan diegene in nood, veral kinders en gesinne wat swaarkry in koue omstandighede.
“Elke finalis word aangemoedig om ‘n verskil in haar gemeenskap te maak en ek is bly ek kan ‘n verskil maak,’’ het sy gesê.
Vir meer inligting of om donasies te maak, skakel haar by 083 656 5014.
Die Prisma VLU-tak het verlede maand ‘n vergadering met die tema Welwillendheid gehou. Die Matlosana Diereskuiling het die tak besoek. Die lede bedank al hul donateurs vir hul bydraes wat bygedra het tot die skuiling se fondse en ook hul besoek. Hendrina Bothma, Istella van Rhyn-Nel, Trix Parsons, Winnie Gerber, Alta Venter (middel) Karen Venter, Anita Visser, Annette Harmse, Annetjie Janse van Rensburg, Flo Groenewald, Marja Stevens en (voor) Marie Vosloo, Petru Claase, Mattie Jordaan en Marlene Grobler was teenwoordig. Maria die skaaphond is heel voor.
Klerksdorp Rekord, Klerksdorp - Die organiseerders van Amira se konsert in die stad was bekommerd dat sy te veel opera gaan sing, maar hul vrese was verniet.
Amira het in ‘n stampvol Hervormde Kerk opgetree en ‘n staande ovasie gekry. Die konsert was op Vrydagaand 9 Mei. Die jong Nederlandse sopraan met ‘n Afrikaanse ma - wat in Klerksdorp grootgeword het voor sy na Nederland verhuis het - het die gehoor bekoor met haar spontane persoonlikheid, haar liefde vir Afrikaans en ook haar geloof.
