GEMSBOK-SPRINGBOK: Daar is onlangs ‘n  tweedae ATKV Skryfwerkswinkel op Springbok gehou.
Die werkswinkels is die herhaling van ‘n wenresep deur skrywer Anzil Kulsen en lewensafrigter, Coba Röhm, #coachCoba soos haar leerders haar noem. 
Vir die ATKV is dit so belangrik dat kontreistories, unieke vertellings, ervarings en verhale vanuit die verskillende diverse sprekers van Afrikaans opgeteken of geskryf moet word.
Daar is soveel skrywers in gemeenskappe, oor die ganse SA, wat nooit die lig sien nie.
Deur die ATKV Skryfwerkswinkels poog Anzil Kulsen om skrywers die nodige riglyne te gee, vanaf die teoretiese bou van ‘n prosastuk tot by die proses van publikasie.

GEMSBOK-UPINGTON: As deel van die Upington Landbou Expo se program, word daar weer die jaar ‘n Slagkompetisie by Desert Beef Abattoir gehou.
Desert Beef/Boomplaas bied op 3 April weer ‘n Skaap & Bees Voerkraaldag aan. Daar gaan ‘n vol program vir belangstellendes aangebied word.
Mnr. Gert Fourie, sameroeper van grootvee by die skou, vra boere om die dag by te woon. Baie moeite word gedoen om die diere voor te berei en om die dag te reël.

Die finaliste van Mej. Upington Skoukoningin is onlangs aangewys.  Die Upington Landbou Expo word vanaf 4 tot 6 April gehou. Vanjaar het hulle die Animal Welfare Society op Upington gekies as hulle liefdadigheidsprojek. Die finaliste van links is: Lauren Snyders, Leande. Du Preez, Charlene Papier, Nicole Snyders, Ankijahh  Olivier, Mahogany  Du Preez, Theone Labuschagne, Amelia Bothma, Alexa Pieterse en Morita Miggel.

Die kroning van Mej. Upington Skoukoningin, word Donderdagaand, 4 April, by die skougronde gehou. Micheal Lindt sal tydens die kroning optree.  Foto: Donovan Photography.

GEMSBOK-UPINGTON: Familie en vriende van die jong akteur en jeugmentor, wyle Jeffrey van Wyk, wat op 25 Desember 2023 oorlede is, het besluit om sy werk voort te sit en hom so te onthou en vereer.
 Jeffrey Van Wyk word beskryf as ‘n baie entoesiastiese persoon - wat lief was om mense te vermaak. 
Jeffrey het ook ‘n passie vir die reel van vertonings  gehad en was nie net betrokke in die film industrie nie.
Jeffrey was deel van die vermaakspan “Teamlimitless” en hulle het vertonings gehou vir opkomende kunstenaars - om hulle talent  bekend te stel en voor ‘n gehoor blootstelling te gee.
Dit was Jeffrey se droom om ‘n groot kunstenaar Upington toe te bring vir ‘n vertoning en so wou hy die ander  plaaslike kunstenaars die geleentheid gegee het om ook op te tree.

Ouma Katriena Esau, die enigste oorblywende spreker van die bedreigde inheemse Suid-Afrikaanse taal N|uu, ?Xuu Katrina Esau, het gister (Sondag, 4 Februarie 2024) haar 91ste verjaarsdag gevier.
Hierdie merkwaardige vrou en kampvegter vir die behoud van haar moedertaal, is verlede jaar met ‘n eredoktorsgraad deur die Universiteit van Kaapstad (UK) toegeken.

GEMSBOK-KENHARDT: Droë-keel en moedelose inwoners van Kenhardt het verlede week, om ‘n memorandum te oorhandig,  voor die Kai !Garib Municipality se kantore vergader. 
Nadat die gemeenskap nou al vir weke sonder water is, eis die warm onder die kraag gemeenskap dringende oplos-sings en dienslewering van die munisipaliteit.
 Die gemeenskap het in hul griefskrif aangedring dat hulle versoeke  in ‘n baie ernstige lig gesien moet word. Verder verwag hulle dat die munisipale bestuur binne twee weke ‘n vergadering sal reël met al die direkteure, die burgermeester en munisipale bestuurder - op ‘n tyd en plek waar ons ook die gemeenskap se insette kan aanhoor.

GEMSBOK-UPINGTON: Die Gemsbok het vanoggend besoek by die Dr Harry Surtie Hospitaal afgelê, nadat ons verskeie klagtes ontvang het dat die gebrek aan lugversorging in die hospitaal ‘n ernstige impak op gesondheidsorg het.
Hoewel lugversorging in jou dag tot dag bestaan as ‘n luuksheid gesien word, kan geen hospitaal funksioneer daarsonder nie.
Buiten vir die impak op beide die gemoedere van die pasiënte en personeel, is daar ernstige gesondheidsrisikos wat erge hitte - soos dit wat in die Benede Oranje gebied ervaar word, meebring.
In Februarie verlede jaar is daar wingerdwerkers aan hitte uitputting dood - vanjaar mag die hitte-doodstyding homself dalk net binne die mure van die streekshospitaal op Upington, herhaal. 

GEMSBOK-UPINGTON:  Die Upington APD en Rhodes Universiteit se CDC-span, is nou al ‘n tyd lank besig om alles reg te kry vir die goedgekeurde Prosopis-projek.
Verlede week was almal by die APD (Sentrum vir Persone met Gestremdhede) baie opgewonde, omdat die biobeheerde Agnippe (Evippe) “knope” op ‘n aantal bome vrygelaat is.  
Die plan is om insekte groot te maak en op terreine rondom die Noord-Kaap vry te laat.

GEMSBOK-UPINGTON: Die Benede-Oranjerivier het die afgelope paar weke stelselmatig gestyg en het Dinsdagoggend teen 865 kumeks deur die dorp gevloei.
Die Gariepdam het die 30 ste Desember begin oorloop en Vanderkloofdam die 10 de Januarie. Die uitvloei uit Vanderkloof het die 7de Januarie begin toeneem toe al twee turbines die eerste keer kon loop en nog toegeneem toe die dam begin oorloop, het mnr. Wilco Fourie, voorsitter van die Oranjerivier Landbou-Unie gesê. 

GEMSBOK-UPINGTON: Die afgelope twee weke het wyndruifprodusente in die Benede-Oranjerivierstreek begin om druiwe by Oranjerivier Wynkelders te lewer.
Vanjaar word al die druiwe by die kelders op Upington gelewer omdat dit ekonomies meer sin maak. So sê die nuwe besturende direkteur van OWK, mnr. Paul du Plessis. Hy sê sy visie vir die maatskappy is om dit meer volhoubaar vir die toekoms te maak sodat dit meer winsgewend vir die aandeelhouers sowel as die produsente kan wees. 

GEMSBOK-KENHARDT: Scatec ASA se sonkrag- en batteryfasiliteit buite Kenhardt, het in Desember 2023 amptelik begin om elektrisiteit aan die nasionale netwerk te produseer en te voorsien.
Die aanleg is gebou met finansiering van ongeveer R18,65 miljard ( $1 miljard).
 Die fasiliteit spog met ‘n gekombineerde geïnstalleerde sonkragkapasiteit van 540MW vanaf drie aanlegte, terwyl sy massiewe batterystelsel tot 225MW krag kan lewer.
Met ‘n kapasiteit van 1 140 MWh kan die battery 150 MW se stuurbare krag konsekwent tussen 05:00 en 21:30 deur die jaar verskaf.

Byna die helfte van die land se munisipaliteite voldoen nie aan drinkwaterstandaarde nie.  Dit word uiteengesit in die land se mees onlangse Blue Drop Watch-verslag, wat toon - soos Minister van die Departement van Water en Sanitasie [DWS] Senzo Mchunu beskryf - “’n kommerwekkende afname in die prestasie van drinkwaterstelsels.”
Die verslag het ondersoek ingestel na die huidige toestand van drinkwaterinfrastruktuur en behandelingsprosesse oor 144 Waterdienste-owerhede (WSA) - wat drinkwater vir huishoudelike, kommersiële en besigheidsgebruik via watervoorsieningstelsels regoor Suid-Afrika se nege provinsies voorsien.