Klerksdorp Midweek, Klerksdorp - Die aap is uit die mou en die kat is uit die sak. Klerksdorp se jaarlikse boekefees spog met ‘n nuwe baadjie. Na drie uiters suksesvolle boekfeeste wat sedert 2020 by Shack to Sanctuary aangebied is, skuif die boekefees vanjaar na ‘n nuwe bestemming, want die fees bars uit sy nate. Verdant Kwekery in Ianstraat is ‘n gewilde bymekaar-kom-plek met genoeg plek om te kuier, luister, lees, eet en drink. Die Klerksdorp Boekefees word op 3 en 4 November gehou. Vanjaar kuier skrywers soos Marita van der Vyver, Dana Snyman, Madelein Rust en Leon van Nierop saam om oor hul jongste topverkopers te gesels. Buiten vir al die stories en gesels, kan besoekers uitsien na ‘n heerlike dag onder die koeltebome by Verdant met kosstalletjies, ‘n kontantkroeg, en ‘n wynlandgoed of twee se stalletjies.
Wêreld gek oor oumas se kuns
Klerksdorp Rekord, Klerksdorp - Twee plaaslike oumas wat woeker met hul wolskeppings het ‘n internasionale ontwerpkompetisie gewen.
Die World of Wearable Art is al beskryf as die mees uitspattigste modevertoning in die wêreld. Dit is ‘n wêreldklas ekstravaganza uniek aan Nieu-Seeland en omarm die wêreld van kuns, mode, argitektuur en ontwerp en enige iemand mag deelneem. Dit is waar die 86-jarige Lena van der Wat en 82-jarige Joanne van Wyk se hekelnaalde oortyd gewerk het. Hul handewerk met die hekel van verskillende kleurvolle oumablokkies het gestalte gegee aan ‘n lewendige kunswerk van ‘n uitspattige ruimtewese in die kategorie Mars and Beyond.
