Een keer per jaar kan Noordwes-Universiteit (NWU) toerisme honeurs-studente van die Mahikeng kampus uitsien na ‘n toerisme toer, en hierdie jaar was Upington hulle eindbestemming. 
Die doel van hierdie jaarlikse toer, volgens dr Walter Wessels, toerismedosent en programleier op die Mahikeng kampus, is om studente die geleentheid te gee om die toerismebedryf eerstehands te ervaar en nuwe industrie groei geleenthede raak te sien. 

GEMSBOK-CALVINIA: Juffrou Marlene Jooste het onlangs ‘n baie geslaagde fliekaand vir die jeug in die Lenie Skippers Gemeenskapsaal gehou.
Meer as 60 jongmense het die aand bygewoon. Lede van die Polisie Gemeenskapsforum was ook teenwoordig. 
Kaptein Visser het oor geslagsgeweld gepraat, leraar Jooste oor keuses wat elkeen maak en juffrou Marlene het gesels oor tienerswangerskappe, HIV/Vigs en ander geslagsiektes.
 Die video, “ Save our daughter” is vertoon. 
Na die fliek is daar ‘n bespreking gehou. Juffrou Marlene sê, “Ons het die kinders huis toe gestuur met popcorn en ek het gesien die fliek en geselsies het hulle baie geraak. Vir ‘n paar was dit baie erg, maar dis dinge waaroor ons moet gesels. Alle lof en eer aan die Here”, het sy afgesluit.

GEMSBOK-UPINGTON: By Hoërskool Duineveld sal Nasionale Melktertdag, 27 Februarie 2024, lank onthou word. Juffrou Sharlene Venter het die idee van ‘n melktertverkoping gehad en die hele skool was vuur en vlam.
Die Afrikaans Huistaal graad 12 D klas, van juffrou Sharlene, was so entoesiasties, dat hulle  sommer onmiddellik na die verkoping afgekondig is, 20 melktertjies bestel en betaal het. Daarna het die bestellings ingestroom tot ‘n rekordgetal van 970!
 Die melktertjies, wat deur SPAR gebak is,  was ‘n lekker grootte en suikersoet. ‘n Mens kan regtig verstaan hoekom die tradisionele melktert steeds gewild is in Suid-Afrika.
Hierdie fondsinsameling is ook gehou ten bate van die Kultuurgroep in Veltieland. Om betrokke te wees by kultuur, is  ‘n groot lekkerte in Duineveld.

Die Sosio Ekonomiese Transformasiespan van die Ariëde Streek van SANParke, het onlangs ‘n streeksvergadering by Augrabies Waterval Nasionale Park gehou.  As deel van hul aktiwiteite het hulle bewusmakingsessies by Augrabies Intermediêre Skool sowel as by Assumpta RC Primêre Skool gehou.
Aletta Links- SET beampte van |Ai-|Ais/Richtersveld  Oorgrenspark aan die woord.

Tydens die Sosio Ekonomiese Transformasiespan se streeksvergadering, het Tshepiso Lephara- SET Beampte van Mokala NP ook deelgeneem aan die bewusmakingsessies.  Die kinders het gevind dat die sessies leersaam was en het 
  heelhartig deelgeneem.