Klerksdorp Record - School News

Sestien medaljes by SA’s

Klerksdorp Rekord, Klerksdorp - KHS-atlete het weer die skool se naam hoog gehou en met 16 medaljes teruggekeer na die pas afgelope SA Kampioenskappe vir hoërskole wat in die Kaap plaasgevind het.

Dit is geen verrassing dat Ewald Jansen (o/19, spiesgooi) en Amogelang (o/19, 5000m) hul items gewen het nie.

Kate-Lynn Fourie en Lize van Zyl het drie medaljes ingepalm terwyl Simphiwe Nero en Dean McAslin elk twee gewen het. Jané van der Bergh, Marques Olivier en Hanro Nel het elk ‘n brons medalje verower in hul verskeie items.

Laerskool Saamtrek trots op kampioene

Klerksdorp Rekord, Klerksdorp - Laerskool Saamtrek spog met twee kampioene na die afgelope ASA kampioenskappe vir laerskole.

Altesaam 17 atlete van Laerskool Saamtrek het aan die kampioenskappe deelgeneem wat gedurende die vakansie in Polokwane gehou is.

Ryan Beets het eerste stem dik gemaak in die gewigstoot vir seuns o/10. Hy het die SA rekord in flarde laat spat met ‘n allemintige gooi van 12.47m. Die ou rekord het gestaan op 11.93m!

Die provinsiale rekordhouer in hoogspring, Declynne da Silva het met haar lang bene korte mette gemaak van haar teenstander en die hoogspring vir meisies o/12 ingepalm. Declynne het nog nie vanjaar in die item verloor nie en is beslis ‘n jong atleet om dop te hou.

Nog ’n trofee vir KHS

KHS se o/16 span het hul Bosveldweek Rugbytoernooi in Modimolle gewen deur vir Ellisras in die finaal te klop met 12-10. Spankaptein Karabelo Maseko hou die trofee vas.

Foto: Verskaf.

Spiesgooiers wen medaljes

Klerksdorp Rekord, Klerksdorp - KHS se kampioen spiesgooi-atleet het nie teleurgestel by die ASA atletiekkampioenskap nie.

Ewald Jansen het ‘n goue medalje gewen met ‘n nuwe persoonlike beste afstand van 69,80 m. Afrigter Erich Wiese se spiesgooifabriek het nog drie medaljes behaal. Marco Symington (silwer), Marques Olivier (brons) en Gerrit Koen (brons) keer ook met medaljes terug.

Julindi Wilkens het ‘n sesde plek behaal.

Langasem Amogelang Tatai het ‘n silwer medalje in die 3 000m gewen.

Wessies blitsig by ASA-atletiek in Pretoria

Klerksdorp Rekord, Klerksdorp - Atlete van Hoërskool Wesvalia het puik gevaar by die ASA atletiekbyeenkoms op die Pilditchstadion in Pretoria.

Amoné le Roux het ‘n goue medalje ingepalm in driesprong en Denike Jordaan het silwer losgehardloop in die 400m. Amoné was ook agste in die verspring.

Ander uitblinkers is Denike Jordaan (silwer in die 400m), André Visser (agste in die 400m), Carli Visser (400m 8ste en 400mh 5de), Luche vd Berg (2000m Hindernis 7de en 14de in die 3000m), Mienke Blignaut (16de in die 400m) en Jelani White (hoogspring 15de).