MELKTERT-NAGEREGTE

Soos koeksisters en malvapoeding is melktert ’n goeie voorbeeld van ‘n regte Suid-Afrikaanse nagereg wat reeds van die middeleeue af bekend is. Vanaf 2013 is 27 Februarie ‘n opwindende dag vir al die melktert-liefhebers. Die idée vir Nasionale Melktertdag het begin by die joernaliste van die Weg-tydskrif toe hulle besef melktert is die perfekte namiddag-soetigheid.
Op Weg! se webwerf verduidelik hulle dit wat gevolg het só: “Dié nuus was te goed om nie te verkondig nie, en die daaropvolgende jaar was vriende, lesers, radiostasies, Facebook-kennisse, koffiewinkelbase en sjefs oorgehaal om ook op 27 Februarie melktert te bak, te sny en saam met geliefdes te geniet. Omtrent oornag het iets wat as ’n hunkering na ’n soetigheidjie begin het, gegroei tot Nasionale Melktertdag.
Dit is duidelik dat almal in Suid-Afrika sal saamstem dat ‘n melktert ‘n lekker “ding” is, of dit nou met kaneelsuiker of met amandel gegeur is, en of dit met ’n eenvoudige broskors of ryker skilferkors warm uit die oond voorgesit word, melktert bly egte trooskos en is ’n heimwee-smaak van kindertyd en gesellige saamkuier-oomblikke. Hierdie week het die Rustenburg Herald-kookspan gaan kuier by “Flower Fun” met ’n tafel vol melktert-nageregte! Charlene Mostert & Mariesa van Heerden deel die heerlike resepte vir “melktert-pringles”, pannekoek-en-melktert-laagkoek en so ook n koffie-en-melktert-Don Pedro met ons! Gaan maak n draai by “Flower Fun” se koffiewinkel vir een van die heerlikste melktert-nageregte en nog vele meer. Hulle is geleë in winkel nr 18; Value Mart-winkelsentrum, Augrabieslaan no1, Rustenburg