03
Thu, Apr

Bread / Dough
Typography
  • Smaller Small Medium Big Bigger
  • Default Helvetica Segoe Georgia Times

Nouja, noudat dit lyk of “mooi broodjies bak” van verlede week af die inding in Rustenburg Herald se kookrubriek is, het ons span “kokke” ‘n stewige uitdaging van Laerskool Rustenburg se bemarkers/koördineerders ontvang. Toe Rustenburg Herald se kookspannetjie verlede week ons hand aan die bekende “bruschetta” gewaag het, het Louise van der Walt en Anel Burger besluit om Larries se nou-reeds bekende Larriebroodjie met ons te deel. Dit is duidelik dat hierdie broodjie nie alleen uitstekend vir langs die sportveld is nie - dié Larriebroodjie sal gewis enige tyd en enige plek met oop arms verwelkom word. Die Larriebroodjie is ’n stewige, vullende Franse broodjie met ‘n egte boere “twist”. Dit is die perfekte happie vir die mammas en pappas wat van vroegoggend af langs die rugbyveld of netbalbaan staan, hul kinders aanmoedig en weet dat ‘n lang dag voorlê.
Louise van der Walt, (projek- en borge-koördineerder) en Anel Burger, die bemarkingsbeampte van Laerskool Rustenburg, het hierdie vinnige, maklike en vullende broodjie vir ons aanmekaargesit. Want as daar een ding is wat by ‘n sportdag nodig is, is dit ‘n ordentlike broodjie met genoeg skop aan die binne- en buitekant! Hulle maak dit só: 

Bestanddele:

1 Franse brood (French loaf)  
Botter vir smeer  
Blaarslaai
Komkommer, in dun skywe gesny  
Tamatie, in dun skywe gesny  
200 g beesvleis, dun gesny   
Rooi uie in dun repies gesny
2 eetlepels Mayonnaise  
Gerasperde kaas
1 ryp avokado, in skywe gesny  
Sout en peper na smaak  

Maak dan so: 

Sny die Franse brood in die lengte oop en smeer beide helftes liggies met botter. Pak ‘n lekker lagie blaarslaai vir ‘n kraakvars smaak. Rangskik die dun gesnyde beesvleis bo-op die blaarslaai.  Smeer ’n dun lagie Mayonnaise oor die vleis en oor die boonste helfte van die brood.  
Pak die tamatie, komkommerskywe, uie en avokado bo-op. Geur met sout en peper.  Plaas ‘n lagie gerasperde kaas bo-op. Vou die boonste helfte van die brood toe en druk liggies vas.  Sny in die helfte en geniet dit langs die sportveld of op enige plek waar ‘n aktiewe gesin hulle dalk mag bevind!