Nouja, met die herfs feitlik in volle swang is die belangrikste boodskap dat die winter van 2025 aan die kom is en te oordeel aan die mildelike reën oor die afgelope klompie maande, sal dit wys wees om te verwag dat dit ‘n lang en koue winter gaan wees. So, die hol kol op die maag bly vir etlike maande pla en ‘n happie om tydig of ontydig te eet, is maar meestal baie welkom – veral oor naweke wanneer ons by die huis voor die tv of met vriende ontspan. Mariana Paul is ‘n Rustenburgse sakevrou en semi-aktrise wat ook in die kombuis deeglik onderleg is. Mariana is bekend vir haar groot verskeidenheid heerlike en oorspronklike muffin-idees. Hierdie week deel sy twee hiervan met ons – die eerste ‘n doodgewone “standaard” muffinresep en die tweede – ‘n sogenaamde “Morning Glory”-muffin wat ‘n bietjie meer skop binne en buite het. Mariana maak dié muffins só:
Gewone muffins – (Nutty Wheat – bak 24)
500 ml Nutty Wheat
200 ml suiker
5 ml bakpoeier
5 ml koeksoda
250 ml melk
1 eier
50 ml olie
Metode:
Voorverhit die oond op 180 °C. Smeer twee muffinpannetjies. Meng al die droë bestanddele saam. Plaas melk, olie en eier in ‘n beker en meng saam en meng dan goed saam met die droë bestanddele. Skep uit in muffinpannetjies en bak vir 15 tot 20 minute.
Morning Glory muffins
500 ml Nutty Wheat.
1/3 (‘n derde) koppie goue stroop of heuning
5 ml bakpoeier
5 ml koeksoda
250 ml laevet-melk
1 eier
50 ml olie
½ t kaneel
Knippie sout
Gerasperde skil van 1 lemoen
250 ml rosyntjies
2 gerasperde wortels
1 gerasperde groenappel
Metode:
Voorverhit die oond op 180 °C. Smeer twee muffinpannetjies. Meng droë bestanddele saam. Voeg gerasperde lemoenskil by. Meng heuning, melk, eier en olie saam. Voeg dit by die droë bestanddele. Meng liggies saam. Voeg nou rosyntjies, wortels, appel en okkerneute by die mengsel en meng deeglik. Skep uit in muffinpannetjies en bak 15 tot 20 minute tot gaar.
Beide hierdie muffins is te heerlik vir woorde sommer net so uit die oond as dit ‘n bietjie afgekoel het. As jy ‘n ietsie ekstra verkies, is die keuse eindeloos – botter/margarien, kaas, piesang, konfyt (arbeikonfyt), of daardie spesiale botteltjie “geheimenis” in jou koskas. Geniet met koppie lekker koffie of tee. Twee van hierdie muffins in die skoolkosblik sal natuurlik ook vir die kinders ‘n heerlike en vullende verrassing wees.
