WATERTAND KLAPPER-YS EN BOTTERKOEK-KOLWYNTJIES

Heng, ons het nou die dag amper ons vingers afgeëet toe “Raak die ‘klits’ kwyt” genooi is vir ‘n baksessie met botterkoek-kolwyntjies en klapper-ys. Wat die sessie ‘n buitengewone en ons wil amper sê ‘n “historiese gebeurtenis” gemaak het (behalwe nou die “sugar rush” later die aand), was die feit dat nie minder nie as vier geslagte vir die bak-en-brou-sessie saam in die kombuis byeen was... 
“Alweer cup cakes” het ons gewonder toe ons ‘n rukkie later vir die bakkery op pad was na Julinda Horn se huis bo in die dorp. (Ons moet seker maar verswyg dat ons, ons só aan die klapper-ys en kolwyntjies vergryp het dat vroulief Cecilia my later die aand slegs met behulp van kalmeermiddels en allerlei ander preparate met albei voete in die bed kon kry?) 
Hoe dit ook al sy - die vier geslagte wat vir ‘n stukkie geskiedenis gesorg het, was tannie Leen van Zyl (84), Julinda Horn, haar pragtige dogter Michelle Leih en die tweejarige Julané Leih. 
Ons het begin met die klapper-ys wat eintlik baie makliker is as wat ‘n mens dink. Ons moet dalk net hier noem, ten spyte van die “sugar rush” later die aand, is Linda se klapper-ys nie naastenby so ‘bittersoet” as wat ‘n mens normaalweg teëkom nie, - seker maar hoekom ‘n mens so baie daarvan kan verorber dat jy later die aand met hemelhoë bloedsuiker sit...?)